یہاں اب کچھ نہیں ہو گا
March 5, 2011 at 7:35 PM
—
Administrator
حامد عتیق
کوئی قسمت نہ بدلے گی
کوئی تارا نہ نکلے گا
کوئی شبنم نہ ٹپکے گی
کوئی سورج نہ چمکے گا
کہ
اب آسیب کے تاریک سے تاریک تر
ہونے کی منزل ہے۔
یہ دھرتی۔۔۔۔
جس جگہ پہ آنکھ کھولی تھی
جہاں پر خواب دیکھے تھے۔
وہ دھرتی
رات کی بے رحم تاریکی کے بستر پر
مسلسل خون تھوکے جا رہی ہے
کبھی معصوم بچوں کا
کبھی مزدور ہاتھوں کا
کبھی معتوب لفظوں کا
کبھی مقہور طبقوں کا
لہو کا کھیل جاری ہے
ابھرتی سوچ،
امیدِ سحر کا خون جاری ہے۔
سیاہی کی عطا سے
نفرتوں کے بیج اب
بارود کی فصلوں میں ڈھلتے ہیں
جو اس دھرتی کے سینے پہ
دلوں کے داغ کی صورت
نجانے کب سے جلتے ہیں۔
اک عہد_مرگ ہے ایسا
مسیحا دم بخود ہیں
اب دعا تک کا نہیں کہتے
دما دم انا للہ ، آنجہانی۔۔۔۔
ورد جاری ہے
(کئی دن سے جنازوں کی نمازیں
نماز_ پنجگانہ سے بھی زیادہ ہیں۔۔)
کہ اب لحظہ بہ لحظہ
کسی انجان منزل سے
قضا کی چیخ آتی ہے
سماعت دم بخود ہے۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ عزرائیل ہے دیکھو۔۔۔۔
یا اسرافیل ہے شاید۔
48f3842f-537b-4770-b785-b0c9e4b04a61|4|3.5
Posted in:
Tags: